ስለ አስተምህሮ

በስመ አብ ወወልድ ወመንፈስ ቅዱስ አሐዱ አምላክ አሜን

ከሁሉ አስቀድመን ምስጋና የባህሪው ለሆነው አምላካችን ምስጋናን እናቀርባለን፡፡ በሥራችንም ሁሉ ይረዳን ዘንድ ቅዱስ ፈቃዱ እንዲሆንልንም ዘወትር በፊቱ እንቆማለን፡፡

አስተምህሮ ዘኦርቶዶክስ ተዋህዶ የጡመራ መድረክ ዛሬ ህዳር 21 ቀን 2010 ዓ.ም ተመሠረተች፡፡ የጡመራ መድረኳ ስያሜ ‘አስተምህሮ’ እንደመሆኑ በዚህ የመጀመሪያው ጡመራችን አስተምህሮ የሚለውን ቃል ትርጉም በአጭሩ እንመለከታለን፡፡ አስተምህሮ የሚለው ቃል ሁለት ዓይነት ትርጉም አለው፡፡

አንደኛ፤ አስተምህሮ ማለት የትምህርት አሰጣጥ ሥርዓት ማለት ሲሆን ይህም የትምህርቱን ይዘት፣ የይዘቱንም ምንጭ፣ የትምህርቱን አሰጣጥ ስልት፣ የመምህራኑና የተማሪዎቹን መስተጋብር ወዘተ… ያጠቃልላል፡፡ የኢትዮጵያ ኦርቶዶክስ ተዋህዶ ቤተክርስቲያን አስተምህሮ ከሚገለፅባቸው መንገዶች መካከልም የአደባባይ ስበከት (ለምዕመናን የሚሰበከው)፣ የወንበር ትምህርት (በአብነት ትምህርት ቤት የሚሰጠው) ፣ ልዩ ስልጠናና (በኮርስ መልክ የሚሰጠው ትምህርት) በመገናኛ ብዙሀን (በጋዜጣ በመጽሔት በድረ ገፅ) የሚሰጡት ትምህርቶች ይገኙበታል፡፡

ሁለተኛ፤ መሀረ ማለት ይቅር አለ ማለት ሲሆን፤  አስተምህሮ ማለት ይቅርታ መጠየቅ /ምልጃ/ ማለት ነው፡፡ ቤተ ክርስቲያን ስለ ልጆቿ ይቅርታ የምትጠይቅበት፤ ምዕመናንንም ስለ በደላቸው ይቅርታ የሚጠይቁበት፤ ስለዚህም በስፋት ትምህርት የሚሰጥበት ዘመንም ዘመነ አስተምህሮ ይባላል፡፡ በቤተ ክርስተያናችን የዘመን አቆጣጠር /አከፋፈል/ መሠረት ከኀዳር 6 ጀምሮ እስከ ታኀሣሥ 13 ድረስ ያለው ወቅት ዘመነ አስተምህሮ ይባላል፡፡

አስተምህሮ ዘኦርቶዶክስ ተዋህዶ የጡመራ መድረክ የኢትዮጵያ ኦርቶዶክስ ተዋህዶ ቤተክርስቲያን ትምህርት የሚቀርብባትና ወቅታዊ የቤተክርስቲያን መረጃዎችንም ለአንባቢያን የሚሰራጩባት አዲስ ብሎግ ናት፡፡

አስተምህሮም በይዘቷ በመጀመሪያው ላይ በማተኮር ለአንባቢያን ይበጃሉ ይጠቅማሉ ያልናቸውን ትምህርቶችንና ወቅታዊ መረጃዎችን የምናደርስባት አዲስ የጡመራ መድረክ ናት፡፡ በዘመነ አስተምህሮ ስለተመሠረተችም ስያሜዋን “አስተምህሮ” ብለናታል፡፡ ለሁላችንም መልካም የአገልግሎት ዘመን እንዲሆንልን በጸሎታችሁ እንድታስቡንና ገንቢ አስተያየታችሁንም በማጋራቱ በኩል እንዳትለዩንም በትህትና እንጠቃለን፡፡

ወስብሐት ለእግዚአብሔር