አአትብ ገጽየ ወኵለንታየ  በትእምርተ መስቀል። በስመ አብ ወወልድ ወመንፈስ ቅዱስ አሐዱ አምላክ በቅድስት ሥላሴ እንዘ አአምን ወእትመሐፀን እክሕደከ ሰይጣን በቅድመ ዛቲ እምየ ቅድስት ቤተ ክርስቲያን እንተ ይእቲ ስምዕየ ማርያም ጽዮን ለዓለመ ዓለም።

ነአኵተከ እግዚኦ ወንሴብሐከ ንባርከከ እግዚኦ ወንትአመነከ፡ ንገኒ ለከ እግዚኦ ወንትቀነይ ለስምከ ቅዱስ፡  ንሰግድ ለከ  ኦ ዘለከ ይስግድ ኩሉ ብርክ ወለከ ይትቀነይ ኩሉ ልሳን። አንተ ውእቱ አምላከ አማልክት ወእግዚአ አጋዕዝት ወንጉሠ ነገሥት አምላክ አንተ ለኵሉ ዘሥጋ ወለኩላ ዘነፍስ ወንጼውዐከ በከመ መሐረነ ቅዱስ ወልድከ እንዘ ይብል አንትሙሰ ሶበ ትጼልዩ ከመዝ  በሉ።

አቡነ ዘበሰማያት ይትቀደስ ስምከ ትምጻእ መንግሥትከ። ወይኩን ፈቃድከ በከመ በሰማይ ከማሁ በምድር ሲሳየነ ዘለለ ዕለትነ ሀበነ ዮም። ኅድግ ለነ አበሳነ ወጌጋየነ ከመ ንኅነኒ ንኅድግ ለዘአበሰ ለነ። ኢታብአነ እግዚኦ ውስተ መንሱት። አላ አድኅነነ ወባልሐነ እምኲሉ እኩይ እስመ ዚአከ ይእቲ መንግሥት ኃይል ወስብሐት ለዓለመ ዓለም።

በሰላመ ቅዱስ ገብርኤል መልአክ ኦ እግዝእትየ ማርያም ሰላም ለኪ። ድንግል በኅሊናኪ ወድንግል በሥጋኪ። እመ እግዚአብሔር ጸባዖት ሰላም ለኪ። ቡርክት አንቲ እም አንስት ወቡሩክ ፍሬ ከርሥኪ። ተፈስሒ ፍስሕት ኦ ምልዕተ ጸጋ እግዚአብሔር ምስሌኪ። ሰአሊ ወጸልዪ ምሕረተ ኀበ ፍቁር ወልድኪ ኢየሱስ ክርስቶስ ከመ ይሥረይ ለነ ኃጣውኢነ።

ጸሎተ ሃይማኖት: ነአምን በአሐዱ አምላክ እግዚአብሔር አብ አኃዜ ኲሉ ገባሬ ሰማያት ወምድር ዘያስተርኢ ወዘኢያስተርኢ። ወነአምን በአሐዱ እግዚእ ኢየሱስ ክርስቶስ ወልደ አብ ዋሕድ ዘህልው ምስሌሁ እምቅድመ ይትፈጠር ዓለም። ብርሃን ዘእምብርሃን አምላክ ዘእምአምላክ ዘበአማን።  ዘተወልደ ወአኮ ዘተገብረ ዘዕሩይ ምስ አብ በመለኮቱ። ዘቦቱ ኲሉ ኮነ ወዘእንበሌሁሰ አልቦ ዘኮነ ወኢምንትኒ ዘበሰማይኒ ወዘበምድርኒ።  ዘበእንቲአነ ለሰብእ ወበእንተ መድኃኒትነ ወረደ እምሰማያት። ተሰብአ ወተሠገወ እመንፈስ ቅዱስ ወእማርያም እምቅድስት ድንግል። ኮነ ብእሴ ወተሰቅለ በእንቲአነ በመዋዕለ ጲላጦስ ጴንጤናዊ ሐመ ወሞተ ወተቀብረ ወተንሥአ እሙታን አመ ሣልስት ዕለት በከመ ጽሑፍ ውስተ ቅዱሳት መጻሕፍት። ዐርገ በስብሐት ውስተ ሰማያት ወነበረ በየማነ አቡሁ ዳግመ ይመጽእ በስብሐት ይኰንን ሕያዋነ ወሙታነ ወአልቦ ማኅለቅት ለመንግሥቱ።  ወነአምን በመንፈስ ቅዱስ እግዚእ ማሕየዊ ዘሠረፀ እምአብ ንስግድ ሎቱ ወብሰብሖ ምስለ አብ ወወልድ ዘነበበ በነቢያት። ወነአምን በአሐቲ ቅድስት ቤተ ክርስቲያን እንተ ላዕለ ኲሉ ጉባኤ ዘሐዋርያት፡ ወነአምን በአሐቲ ጥምቀት ለሥርየተ ኃጢአት። ወንሴፎ ትንሣኤ ሙታን ወሕይወተ ዘይመጽእ ለዓለመ ዓለም።

ቅዱስ ቅዱስ ቅዱስ እግዚአብሔር ጸባዖት ፍጹም ምሉዕ ሰማያተ ወምድረ ቅድሳተ ስብሐቲከ። ንሰግድ ለከ ክርስቶስ ምስለ አቡከ ኄር ሰማያዊ ወመንፈስከ ቅዱስ ማኅየዊ እስመ መጻእከ ወአድኃንከነ።

እሰግድ ለአብ ወወልድ ወመንፈስ ቅዱስ አሐተ ስግደተ (ሠለስተ ጊዜ በል)።  እንዘ አሐዱ ሠለስቱ ወእንዘ ሠለስቱ አሐዱ፤ ይሤለሱ በአካላት ወይትዋሐዱ በመለኮት፤ እሰግድ ለእግዝእትነ ማርያም ድንግል ወላዲተ አምላክ፤ እሰግድ ለመስቀለ እግዚእነ ኢየሱስ ክርስቶስ ዘተቀደሰ በደሙ ክቡር። መስቀል ኃይልነ፤ መስቀል ጽንዕነ፤ መስቀል ቤዛነ፤ መስቀል መድኃኒተ ነፍስነ። አይሁድ ክሕዱ ንሕነሰ አመነ ወእለ አመነ በኃይለ መስቀሉ ድኅነ።

ስብሐት ለአብ ስብሐት ለወልድ ስብሐት ለመንፈስ ቅዱስ (ሠለስተ ጊዜ በል)። ስብሐት ለእግዝእትነ ማርያም ድንግል ወላዲተ አምላክ፤ ስብሐት ለመስቀለ እግዚእነ ኢየሱስ ክርስቶስ። ክርስቶስ በምሕረቱ ይዘከረነ። አመ ዳግም ምጽአቱ ኢያስተኀፍረነ። ለሰብሖተ ስሙ ያንቅሀነ፤ ወበአምልኮቱ ያጽንዐነ፤ እግዝእትነ ማርያም አዕርጊ ጸሎተነ። ወአስተሥርዪ ኃጢአተነ። ቅድመ መንበሩ ለእግዚእነ። ለዘአብልዐነ ዘንተ ኅብስተ፤ ወለዘአስተየነ ዘንተ ጽዋዓ፤ ወለዘሠርአ ለነ ሲሳየነ ወአራዘነ፤ ወለዘተዐገሠ ለነ ኵሉ ኃጢአተነ፤ ወለዘወሀበነ ሥጋሁ ቅዱሰ ወደሞ ክቡረ፤ ወለዘአብጽሐነ እስከ ዛቲ ሰዓት። ነሀብ ሎቱ ስብሐተ ወአኰቴተ ለእግዚአብሔር ልዑል ወለወላዲቱ ድንግል ወለመስቀሉ ክቡር ይትአኰት ወይሰባሕ ስሙ ለእግዚአብሔር ወትረ በኵሉ ጊዜ ወበኲሉ ሰዓት።

ሰላም ለኪ እንዘ ንሰግድ ንብለኪ ማርያም እምነ ናስተበቍዓኪ። እምአርዌ ነዓዊ ተማኅፀነ ብኪ። በእንተ ሐና እምኪ ወኢያቄም አቡኪ ማኅበረነ ዮም ድንግል  ባርኪ።

ጸሎተ እግዝእትነ ማርያም ድንግል ወላዲተ አምላክ። ታዐብዮ ነፍስየ ለእግዚአብሔር። ወትትሐሠይ መንፈስየ በአምላኪየ ወመድኃንየ፤ እስመ ርእየ ሕማማ ለአመቱ። ናሁ እምይእዜሰ ያስተበፅዑኒ ኩሉ ትውልድ። እስመ ገብረ ሊተ ወኃይለ ዐቢያተ ወቅዱስ ስሙ። ወሣህሉኒ ለትውልደ ትውልድ ለእለ ይፈርህዎ። ወገብረ ኃይለ በመዝራዕቱ፡ ወዘረዎሙ ለእለ ያዐብዩ ኅሊና ልቦሙ፡ ወነሠቶሙ ለኃያላን እመናብርቲሆሙ። አዕበዩሙ ለትሑታን፡ ወአጽገቦሙ እምበረከቱ ለርኁባን፡ ወፈነዎሙ ዕራቆሙ ለብዑላን ወተወክፎ ለእስራኤል ቍልዔሁ፡ ወተዘከረ ሣህሎ ዘይቤሎሙ ለአበዊነ ለአብርሃም ወለዘርዑ እስከ ለዓለም።

ውዳሴሃ  ለእግዝእትነ ማርያም  ድንግል  ወላዲተ  አምላክ  ዘይትነበብ  በዕለተ ሰኑይ

ፈቀደ እግዚእ ያግእዞ ለአዳም ኅዙነ ወትኩዘ ልብ ወያግብኦ ኀበ ዘትካት መንበሩ። ሰአሊ ለነ ቅድስት።

ሠረቀ በሥጋ እምድንግል ዘእንበለ ዘርአ ብእሲ ወአድኀነነ። ለሔዋን እንተ አስሐታ ከይሲ ፈትሐ ላዕሌሃ እግዚአብሔር እንዘ ይብል ብዙኅ አበዝኆ ለሕማምኪ ወለፃዕርኪ ሠምረ ልቡ ኀበ ፍቅረ ሰብእ ወአግዓዛ። ሰአሊ ለነ ቅድስት።

ኢየሱስ ክርስቶስ ቃል ዘተሰብአ ወኀደረ ላዕሌነ ወርኢነ ስብሐቲሁ ከመ ስብሐተ አሐዱ። ዋህድ ለአቡሁ ሠምረ ይሣሃለነ። ሰአሊ ለነ ቅድስት።

ርእየ ኢሳይያስ ነቢይ በመንፈሰ ትንቢት ምሥጢሮ ለዐማኑኤል ወበእንተዝ ጸርሐ እንዘ ይብል ሕፃን ተወልደ ለነ ወልድ ተውህበ ለነ። ሰአሊ ለነ ቅድስት።

ተፈሣሕ ወተሐሠይ ኦ ዘመደ ዕጓለ እመሕያው እስመ አፍቀሮ እግዚአብሔር ለዓለመ ወመጠወ ወልዶ ዋህደ ከመ ይህየው ኲሉ ዘየአምን ቦቱ እስከ ለዓለም ፈነወ ለነ መዝራዕቶ ልዑለ።ሰአሊ ለነ ቅድስት።

ዘሀሎ ወይሄሉ ዘመጽአ ወካዕበ ይመጽእ ኢየሱስ ክርስቶስ ቃል ዘተሰብአ እምኔኪ ዘእንበለ ውላጤ ኮነ ፍጹመ ሰብእ ኢተበዐደ ወኢተፈልጠ በኲሉ ግብሩ ወልድ ዋህድ አላ አሐዱ ራእይ ወአሐዱ ህላዌ ወአሐዱ መለኮት ዘእግዚአብሔር ቃል። ሰአሊ ለነ ቅድስት።

ተፈሥሒ ኦ ቤተ ልሔም ሀገሮሙ ለነቢያት እስመ በኀቤኪ ተወልደ ክርስቶስ ዳግማይ አዳም ከመ ያግብኦ ለአዳም ቀዳሚ ብእሲ እምድር ውስተ ገነት ይስዐር ፍትሐ ሞት። ኦ አዳም መሬት አንተ ወትገብእ ውስተ መሬት። ኀበ ሀለወት ብዝኅት ኃጢአት በህየ ትበዝኅ ጸጋ እግዚአብሔር። ሰአሊ ለነ ቅድስት።

ትትፌሣሕ ወትትሐሠይ ኵሉ ነፍስተ ሰብእ ምስለ መላእክት ይሴብሕዎ ለክርስቶስ ንጉሥ ይጸርሑ ወይብሉ ስብሐት ለእግዚአብሔር በሰማያት ወሰላም በምድር ሥምረቱ ለሰብእ እስመ ሰዐረ ዘትካት ወነሠተ ምክሮ ለጸላዒ። ወሠጠጠ መጽሐፈ ዕዳሆሙ ለአዳም ወለሔዋን ወረሰዮሙ አግዓዝያነ ዘተወልደ ለነ በሀገረ ዳዊት መድኃኒነ ኢየሱስ ክርስቶስ። ሰአሊ ለነ ቅድስት።

ብርሃን ዘበአማን ዘያበርህ ለኩሉ ሰብእ ለእለ ይነብሩ ውስተ ዓለም። በእንተ ፍቅረ ሰብእ መጻእከ ውስተ ዓለም ወኵሉ ፍጥረት ተፈሥሐ በምጽአትከ። እስመ አድኀንኮ ለአዳም እምስህተት ወረሰይካ ለሔዋን አግዓዚተ እምጻዕረ ሞት ወወሀብከነ መንፈስ ልደት። ባረክናከ ምስለ መላእክቲከ። ሰአሊ ለነ ቅድስት።

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ሠሉስ

አክሊለ ምክሕነ ወቀዳሚተ መድኃኒትነ ወመሠረተ ንጽሕነ ኮነ በማርያም ድንግል እንተ ወለደት ለነ ዘእግዚአብሔር ቃለ ዘኮነ ሰብአ በእንተ መድኃኒትነ። እምድኅረ ኮነ ሰብአ ጥዩቀ አምላክ ፍጹም ውእቱ ወበእንተዝ ወለደቶ እንዘ ድንግል ይእቲ። መንክር ኃይለ ወሊዶታ ዘኢይትነገር። ሰአሊ ለነ ቅድስት።

እስመ በፈቃዱ ወበሥምረተ አቡሁ ወመንፈስ ቅዱስ መጽአ ወአድኀነነ። ዐቢይ ውእቱ ስብሐተ ድንግልናኪ ኦ ማርያም ድንግል ፍጽምት ረከብኪ ሞገሰ እግዚአብሔር ምስሌኪ። አንቲ ውእቱ ሰዋስው ዘርእየ ያዕቆብ እምድር ዘይበጽሕ እስከ ሰማይ ወመላእክተ እግዚአብሔር የዐርጉ ወይወርዱ ውስቴታ። ሰአሊ ለነ ቅድስት።

አንቲ ውእቱ ዕፅ ዘርእየ ሙሴ በነደ እሳት ወኢትውዒ። ዘውእቱ ወልደ እግዚአብሔር መጽአ ወኃደረ ውስተ ከርሥኪ ወእሳተ መለኮቱ ኢያውዓየ ሥጋኪ። ሰአሊ ለነ ቅድስት።

አንቲ ውእቱ ገራህት ዘኢተዘርአ ውስቴታ ዘርእ ወጽአ እምኔኪ ፍሬ ሕይወት። አንቲ ውእቱ መዝገብ ዘተሣየጠ ዮሴፍ ወረከበ በውስቴታ ባሕርየ ዕንቈ ክቡረ ዘውእቱ መድኃኒነ ኢየሱስ ክርስቶስ ተጸውረ በከርሥኪ ወወለድኪዮ ውስተ ዓለም። ሰአሊ ለነ ቅድስት።

ተፈሥሒ ኦ ወላዲተ እግዚእ ኃሤቶሙ ለመላእክት ተፈሥኢ ኦ ንጽሕት ዜናሆሙ ለነቢያት። ተፈሥሒ እስመ ረከብኪ ሞገሰ እግዚአብሔር ምስሌኪ። ተፈሥሒ እስመ ተወከፍኪ ቃሎ ለመልአክ ፍሥሐ ኵሉ ዓለም። ተፈሥሒ ኦ ወላዲተ ፈጣሬ ኵሉ ዓለም። ሰአሊ ለነ ቅድስት።

ተፈሥሒ እስመ ድልወ ተሰመይኪ ኦ ወላዲተ አምላክ። ተፈሥሒ ኦ መድኃኒታ ለሔዋን። ተፈሥሒ እንተ አጥበውኪ ሐሊበ ለዘይሴስዮ ለኵሉ ፍጥረት። ተፈሥሒ ኦ ቅድስት እሞሙ ለኵሎሙ ሕያዋን ናንቀዐዱ ኀቤኪ ትስአሊ በእንቲአነ ሰአሊ ለነ ቅድስት።

ኦ ድንግል ኦ ቅድስት ኦ ወላዲተ እግዚእ እስመ ወለድኪ ለንጉሠ መንክር ምሥጢር ኀደረ ላዕሌኪ ለመድኃኒተ ዚአነ ናርምም እስመ ኢንክል ፈጽሞ ጥንቁቀ ነጊረ በእንተ ዕበዩ ለውእቱ ገባሬ ሠናያት በብዙኅ መንክር ራእይ። ሰአሊ ለነ ቅድስት።

ቃለ አብ ሕያው ዘወረደ ውስተ ደብረ ሲና። ወወሀበ ሕገ ለሙሴ ወከደነ ርእሰ ደብር በጊሜ ወጢስ በጽልመት ወነፋስ ወበድምፀ ቃለ አቅርንት ይጌሥፅ ለእለ ይቀውሙ በፍርሃት። ሰአሊ ለነ ቅድስት።

ውእቱኬ ዘወረደ ኀቤኪ ኦ ደብር ነባቢት በትህትና መፍቀሬ ሰብእ ተሰብአ እምኔኪ ዘእንበለ ውላጤ ፍጹመ ሥጋ ነባቢ ዘከማነ በመንፈሰ ጥበብ አምላክ ኀደረ ላዕሌሃ ኮነ ፍጸመ ሰብአ ከመ ያድኅኖ ወይሥረይ ኃጢአቶ ለአዳም። ወያንብሮ ውስተ ሰማያት ወያግብኦ ኀበ ዘትካት መንበሩ በዕበየ ሣህሉ ወምሕረቱ። ሰአሊ ለነ ቅድስት።

ዕበያ ለድንግል ኢይትከሃል ለተነግሮ። እስመ እግዚእ ኀረያ። መጽአ ወኀደረ ላዕሌሃ ዘየኀድር ውስተ ብርሃን ኀበ አልቦ ዘይቀርቦ። ተጸውረ በከርሣ ተስዐተ አውራኃ ዘኢይትረአይ ወዘኢይትዐወቅ። ወለደቶ ማርያም እንዘ ድንግል ይእቲ። ሰአሊ ለነ ቅድስት።

ዘውእቱ ዕብን ዘርእየ ዳንኤል ነቢይ ዘተበትከ። እምደብር ነዋኅ ዘእንበለ እድ ዘውእቱ ቃል ዘወጽአ እምኀበ አብ መጽአ ወተሰብአ እምድንግል ዘእንበለ ዘርዐ ብእሲ ወአድኀነነ። ሰአሊ ለነ ቅድስት።

ኮንኪ አጽቀ ንጹሐ ወሙዳየ አሚን። ርትዕት ሃይማኖቶሙ ለቅዱሳን አበዊነ። ኦ ንጽሕት ወላዲተ አምላክ ድንግል ኅትምት ወለድኪ ለነ ቃለ አብ ኢየሱስ ክርስቶስ መጽአ ለመድኃኒትነ። ሰአሊ ለነ ቅድስት።

አንቲ እሙ ለብርሃን ክብርት ወላዲተ እግዚእ እንተ ፆርኪዮ ለቃል ዘኢይትረአይ። እምድኅረ ወለድኪ ኪያሁ ነበርኪ በድንግልና። በስብሐት ወበባርኮት ያዐብዩኪ። ሰአሊ ለነ ቅድስት።

አይ ልሳን ዘይክል ነቢበ ዘይትናገር በእንቲአኪ ኦ ድንግል ንጽሕት እሙ ለቃለ አብ። ኮንኪ መንበሮ ለንጉሥ ለዘይፀውርዎ ኪሩቤል። ናስተበፅዐኪ ኦ ቡርክት ወንዘክር ስመኪ በኵሉ ትውልደ ትውልድ። ኦ ርግብ ሠናይት እሙ ለእግዚእነ ኢየሱስ ክርስቶስ። ሰአሊ ለነ ቅድስት።

ተፈሥሒ ኦ ማርያም እም ወአመት። እስመ ለዘውስተ ሕፅንኪ ይሴብሕዎ መላእክት ወኪሩቤል ይሰግዱ ሎቱ በፍርሀት፤ ወሱራፌል ዘእንበለ ፅርአት። ይሰፍሑ ክነፊሆሙ። ወይብሉ ዝንቱ ውእቱ ንጉሠ ስብሐት። መጽአ ይሥረይ ኃጢአተ ዓለም በዕበየ ሣህሉ። ሰአሊ ለነ ቅድስት።

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ረቡዕ

ኵሉ ሠራዊተ ሰማያት ይብሉ ብፅዕት አንቲ ሰማይ ዳግሚት ዲበ ምድር። ኆኅተ ምሥራቅ ማርያም ድንግል ከብካብ ንጹሕ ወመርዓ ቅዱስ። ነጸረ አብ እምሰማይ ወኢረከበ ዘከማኪ። ፈነወ ዋህዶ ወተሰብአ እምኔኪ። ሰአሊ ለነ ቅድስት።

ኲሉ ትውልድ ያስተበፅዑኪ ለኪ ለባሕቲትከ ኦ እግዝእትነ ወላዲተ አምላክ። ተነበዩ ላዕሌኪ ዐቢያተ ወመንክራተ ሀገረ እግዚአብሔር እስመ ኮንኪ አንቲ ማኅደረ ለፍሡሐን። ኵሎሙ ነገሥተ ምድር የሐውሩ በብርሃንኪ ወአሕዛብኒ በጸዳልኪ። ኦ ማርያም ኲሉ ትውልድ ያስተበፅዑኪ ወይሰግዱ ለዘተወልደ እምኔኪ ወየዐብይዎ። ሰአሊ ለነ ቅድስት።

አንቲ ዘበአማን ደመና እንተ አስተርአይኪ ለነ ማየ ዝናም። ትእምርተ ዋህዱ ረሰየኪ አብ። መንፈስ ቅዱስ ኀደረ ላዕሌኪ ወኃይለ ልዑል ጸለለኪ ኦ ማርያም አማን ወለድኪ ቃለ ወልደ አብ ዘይነብር ለዓለም መጽአ ወአድኀነነ እምኃጢአት። ዐቢይ ውእቱ ክብር ዘተውህበ ለከ ኦ ገብርኤል መልአክ ዜናዊ ፍሡሐ ገጽ ሰበከ ለነ ልደተ እግዚእ ዘመጽአ ኀቤነ። ወአብሠርካ ለማርያም ድንግል ዘእንበለ ርስሐት ወትቤላ ተፈሥሒ ኦ ምልዕተ ጸጋ እግዚአብሔር ምስሌኪ፡ ሰአሊ ለነ ቅድስት።

ረከብኪ ፀጋ መንፈስ ቅዱስ ኀደረ ላዕሌኪ ወኃይለ ልዑል ጸለለኪ ኦ ማርያም አማን ወለድኪ ቅዱሰ። መድኅኑ ለኵሉ ዓለም መጽአ አድኃነነ። ሰአሊ ለነ ቅድስት።

ግብረ ድንግል ይሴብሕ ልሳንነ ዮም ንወድሳ ለማርያም ወላዲተ አምላክ በእንተ ዘተወልደ እምኔሃ በሀገረ ዳዊት እግዚእነ ወመድኀኒነ ኢየሱስ ክርስቶስ። ንዑ ኵልክሙ አሕዛብ ናስተብፅዓ ለማርያም እስመ ኮነት እመ ድንግለ ወጽሙረ። ተፈሥሒ ኦ ድንግል ንጽሕት እንተ አልባቲ ርኲስ ዘመጽአ ቃለ አብ ወተሰብአ እምኔሃ። ተፈሥሒ ኦ ሙዳይ እንተ አልባቲ ነውር ፍጽምት ዘአልባ ርስሐት። ተፈሥሒ ኦ ገነት ነባቢት ማኅደሩ ለክርስቶስ ዘኮነ ዳግማይ አዳም በእንተ አዳም ቀዳሚ ብእሲ። ተፈሥሒ ኦ ጸዋሪቱ ለዋህድ ዘኢተፈልጠ አምኅፅነ አቡሁ። ተፈሥሒ ኦ ከብካብ ንጹሕ ሥርግው በኵሉ ሥነ ስብሐት መጽአ ወተሰብአ እምኔኪ። ተፈሥሒ ኦ ዕፀ ጳጦስ እንተ ኢያውዐያ እሳተ መለኮት። ተፈሥሒ ኦ አመት ወእም ድንግል ወሰማይ ሰማያዌ እንተ ፆረት በሥጋ ዘይጼዐን ዲበ ኪሩቤል። ወበእንተዝ ንትፈሣሕ ወንዘምር ምስለ መላእክት ቅዱሳን። በፍሥሐ ወበሐሤት ወንበል ስብሐት ለእግዚአብሔር በሰማያት ወሰላም በምድር ሥምረቱ ለሰብእ። እስመ ኪያኪ ሠምረ ዘሎቱ ክብር ወስብሐት። ሰአሊ ለነ ቅድስት።

የዐቢ ክብራ ለማርያም እምኵሎሙ ቅዱሳን እስመ ድልወ ኮነት ለተወክፎ ቃለ አብ ዘይፈርህዎ መላእክት ወየአኵትዎ ትጉሃን በሰማያት። ፆረቶ ማርያም ድንግል በከርሣ። ይእቲ ተዕቢ እምኪሩቤል ወትፈደፍድ እምሱራፌል እስመ ኮነት ታቦተ ለአሐዱ ዘእምቅድስት ሥላሴ። ዛቲ ይእቲ ኢየሩሳሌም ሀገሮሙ ለነቢያት ወማኅደረ ፍሥሐሆሙ ለኵሎሙ ቅዱሳን፣ ሕዝብ ዘይነብር ውስተ ጽልመት ወጽላሎተ ሞት ብርሃን ዐቢይ ሠረቀ ላዕሌሆሙ እግዚአብሔር ዘየዕርፍ በቅዱሳኒሁ ተሰብአ እምድንግል ለመድኀኒት ዚአነ። ንዑ ርእዩ ዘንተ መንክረ። ወዘምሮ ዘምሩ በእንተ ምሥጢር ዘተከሥተ ለነ እስመ ዘኢይሰባእ ተሰብአ ቃል ተደመረ። ወዘአልቦ ጥንት ኮነ ቅድመ ወለዘአልቦ መዋዕል ኮነ ሎቱ መዋዕል። ዘኢይትዐወቅ ተከሥተ ወዘኢይትረአይ ተርእየ። ወልደ እግዚብሔር ሕያው ጥዩቀ ኮነ ሰብአ ኢየሱስ ክርስቶስ ዘትማልም ወዮም ወክመ ውእቱ እስከ ለዓለም። አሐዱ ህላዌ ሎቱ ንስግድ ወንሰብሕ። ሰአሊ ለነ ቅድስት።

ሕዝቅኤል ነቢይ ኮነ ስምዐ በእንቲአሃ ወይቤ ርኢኩ ኆኅተ በምሥራቅ ኅቱም በዐቢይ መንክር ማኅተም አልቦ ዘቦአ ዘእንበለ እግዚአ ኃያላን ቦአ ውስቴታ ወወፅአ። ሰአሊ ለነ ቅድስት።  

ኖኅትስ ድንግል ይእቲ እንተ ወለደት ለነ መድኅነ፣ እምድኅረ ወለደት ኪያሁ ነበረት በድንግልና ከመ ትካት። ቡሩክ ውእቱ ፍሬ ከርሥኪ ኦ ወላዲተ እግዚእ ዘመጽአ ወአድኀነነ እምእደ ጸላዒ ዘአልቦ ምሕረት:: አንቲ ፍጽምት ወቡርክት፣ ረከብኪ ሞገሰ በኀበ ንጉሠ ስብሐት አምላክ ዘበአማን ለኪ ይደሉ ዕበይ ወክብር እምኵሎሙ እለ ይነብሩ ዲበ ምድር፡ ቃለ አብ መጽአ ወተሰብአ እምኔኪ። ወአንሶሰወ ምስለ ሰብእ። እስመ መሐሪ ውእቱ ወመፍቀሬ ሰብእ አድኃነ ነፍሳቲነ በምጽአቱ ቅዱስ። ሰአሊ ለነ ቅድስት።

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ሐሙስ

ዕፀ እንተ ርእየ ሙሴ በነደ እሳት ውስተ ገዳም ወአዕፁቂሃ ኢትውዒ። ትመስል ማርያም ድንግል ዘእንበለ ርኩስ። ተሰብአ እምኔሃ ቃለ አብ ወኢያውዐያ እሳተ መለኮቱ ለድንግል። እምድኅረ ወለደቶ ድንግልናሃ ተረክበ ወመለኮቱ ኢተወለጠ። ኮነ ወልደ ዕጓለ እመሕያው አምላክ ዘበአማን መጽአ ወአድኃነነ። ሰአሊ ለነ ቅድስት።

ናዓብየኪ ኩልነ ኦ እግዝእትነ ወላዲተ አምላክ እስመ ሣህልኪ ይኩን ላዕለ ኩልነ።. ትምክህተ ኩልነ ድንግል ማርያም ወላዲተ አምላክ ዘበእንቲአሃ ተስዕረ ዘቀዳሚ መርገም እንተ ኀደረት ዲበ ዘመድነ በዕልወት ዘገብረት ብእሲት በልዓት እምዕፅ። በእንተ ሔዋን ተዐፅወ ኆኅተ ገነት ወበእንተ ማርያም ድንግል ተርኅወ ለነ ዳግመ። ከፈለነ ንብላዕ እምዕፀ ሕይወት። ዘውእቱ ሥጋሁ ለክርስቶስ ወደሙ ክቡር። በእንተ ፍቅረ ዚአነ መጽአ ወአድኀነነ። አይ ልቡና ወአይ ነቢብ ወአይ ሰሚዕ ዘይክል አእምሮ ዝንቱ ምስጢር መንክራተ ዘይትነበብ ላዕሌሃ እግዚአብሔር መፍቀሬ ሰብእ አሐዱ ውእቱ ባህቲቱ ቃለ አብ ዘሀሎ እምድመ ዓለም በመለኮቱ እንበለ ሙስና እምአሐዱ አብ መጽአ ወተሰብአ ወልድ ዋህድ እምቅድስት እሙ። እምድኅረ ወለደቶ ኢማሰነ ድንግልናሃ ወበእንተዝ ግህደ ኮነት ከመ ወላዲተ አምላክ ይእቲ። ኦ እሙቅ ብዕለ ጸጋ ጥበቡ ለእግዚአብሔር ከርሥ ዘፈትሐ ላዕሌሃ ትለድ በፃዕር ወሕማም ወሐዘነ ልብ ወኮነት ፈልፈለ ሕይወት ወወለደት ዘእንበለ ዘርአ ብእሲ ዘይስዕር መርገመ እምዘመድነ። እንዘ ንብል ስብሐት ለከ ኦ መፍቀሬ ሰብእ። ኄር ወመድኃኔ ነፍሳቲነ። ሰአሊ ለነ ቅድስት።   

ኦ ዝ መንክር ወእፁብ ኃይለ ከርሣ ለድንግል ወላዲተ አምላክ ዘእንበለ ዘርዕ ስምአ ኮነ መልአክ ዘአስተርአዮ ለዮሴፍ እንዘ ይብል ከመዝ እስመ ዘይትወለድ እምኔሃ እመንፈስ ቅዱስ ቃለ አብ እግዚአብሔር ውእቱ ተሰብአ ዘእንበለ ውላጤ። ወለደቶ ማርያም ምክቢተ ዝንቱ ፍስሐ ወይቤ ትወልዲ ወልደ ወይሰመይ ዐማኑኤል ዘበትርጓሜሁ እግዚአብሔር ምስሌነ። ወዓዲ ይሰመይ ኢየሱስሃ ዘያድኅኖሙ ለሕዝቡ እምኃጢአቶሙ። ያድኅነነ በኃይሉ ወይሥረይ ኃጢአተነ። እስመ ጥዩቀ አእመርናሁ ከመ አምላክ ውእቱ ዘኮነ ሰብአ ሎቱ ስብሐት እስከ ለዓለም። ኦ ዝ መንክር ልደተ አምላክ እማርያም እምቅድስት ድንግል አግመረቶ ለቃል ኢቀደሞ ዘርዕ ለልደቱ። ወኢአማሰነ በልደቱ ድንግልናሃ እኀበ አብ ወጽአ ቃል ዘእንበለ ድካም ወእምድንግል ተወልደ ዘእንበለ ሕማም ሎቱ ሰገዱ ሰብአ ሰገል አምፅዑ እጣነ ከመ አምላክ ውእቱ። ወርቀ እስመ ንጉሥ ውእቱ። ወከርቤ ዘይትወሃብ ለሞቱ። ማኅየዊ በእንቲአነ ተወክፈ በፈቃዱ አሐዱ ውእቱ ባህቲቱ ኄር ወመፍቀሬ ሰብእ። ሰአሊ ለነ ቅድስት።

ኦዝ መንክር ነሥአ አሐደ ዐፅመ እምገቦሁ ለአዳም ወለሐኰ እምኔሁ ብእሲተ ወኩሎ ፍጥረተ ዕጓለ እመሕያው። ተውህበ እግዚእ ቃለ አብ ተሰብአ እምቅድስት ድንግል ወተሰምየ ዐማኑኤል። ወበእንተዝ ንስእል ኀቤሃ ኩሎ ጊዜ ከመ ታስተሥሪ በእንቲአነ ኀበ ፍቁር ወልዳ። ኄርት ይእቲ በኀበ ኩሎሙ ቅዱሳን ወሊቃነ ጳጳሳት እስመ አምጽአት ሎሙ ዘኪያሁ ይጸንሑ ወለነብያትኒ አምጽአት ሎሙ ለዘበእንቲአሁ ተነበዩ። ወለሐዋርያትኒ ወለደት ሎሙ ዘሰበኩ በስሙ ውስተ ኩሉ አጽናፈ ዓለም። ለሰማዕት ወለመሃይምናን ወፅአ እምኔሃ ዘተጋደሉ በእንቲአሁ ክርስቶስ ብዕለ ጸጋ ጥበቡ ዘኢይትዐወቅ። ንኅሥሥ ዕበየ ሣህሉ መጽአ ወአድኃነነ። ሰአሊ ለነ ቅድስት።

መሐለ እግዚአብሔር ለዳዊት በጽድቅ ወኢይኔስሕ እስመ እምፍሬ ከርስከ አነብር ዲበ መንበርከ። ወሶበ ተወክፎ ውእቱ ጻድቅ ከመ እምኔሁ ይትወለድ ክርስቶስ በሥጋ ፈቀደ ይኅሥሥ ወይርከብ ማኅደሮ ዘእግዚአብሔር ቃል ወፈፀመ ዘንተ በዐብይ ትጋህ ወእምዝጸርሐ በመንፈስ ወይቤ ናሁ ሰማዕናሁ በኤፍራታ። ወማኅደሮ ለአምላከ ያዕቆብ እንተ ይእቲ ቤተልሔም ዘኀረያ ዐማኑኤል ይትወለድ ውስቴታ በሥጋ ለመድሃኒተ ዚአነ። ካዕበ ይቤላ ካልእ እምነቢያት አንቲኒ ቤተልሔም ምድረ ኤፍራታ ኢትቴሐቲ እምነገሥተ ይሁዳ። እስመ እምኔኪ ይወፅእ ንጉሥ ዘይርእዮሙ ለሕዝብየ እስራኤል። ኦዝ ነገር ለእሉ እለ ተነበዩ ዘበአሐዱ መንፈስ በእንተ ክርስቶስ ሎቱ ስብሐት ምስለ ኄር አቡሁ ወመንፈስ ቅዱስ እምይእዜ ወእስከ ለዓለም። ሰአሊ ለነ ቅድስት።  

ዳዊት ዘነግሠ ለእስራኤል አመ ይትነሥኡ ላዕሌሁ ዕልዋን ፈተወ ይስተይ ማየ እምአዘቅተ ቤተልሔም። ፍጡነ ተንሥኡ መላህቅተ ሐራሁ ወተቃተሉ በውስተ ትእይንተ ዕልዋን ወአምጽኡ ሎቱ ውእተ ማየ ዘፈተወ ይስተይ። ወሶበ ርእየ ውእቱ ጻድቅ ከመ አጥብዑ ወመጠዉ ነፍሶሙ ለቀትል በእንቲአሁ ከዐወ ውእተ ማየ ወኢሰትየ እምኔሁ። ወእምዝ ተኈለቆ ሎቱ ጽድቅ እስከ ለዓለም ። አማን መነኑ ሰማእት ጣዕማ ለዛ ዓለም ወከዐዉ ደሞሙ በእንተ እግዚአብሔር ወተዐገሱ ሞተ መሪረ በእንተ መንግሥተ ሰማያት። ተሣሀለነ በከመ ዕበየ ሣህልከ ። ሰአሊ ለነ ቅድስት።

አሐዱ ዘእምቅድስት ሥላሴ ርእዮ ትሕትናነ አጽነነ ሰማየ ሰማያት። መጽአ ወኀደረ ውስተ ከርሠ ድንግል ወኮነ ሰብአ ከማነ ዘእንበለ ኀጢአት ባሕቲታ። ወተወልደ በቤተልሔም በከመ ሰበኩ ነቢያት። አድኀነነ ወቤዘወነ ወረሰየነ ሕዝበ ዚአሁ ። ሰአሊ ለነ ቅድስት  

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ዓርብ

ቡርክት አንቲ እምአንስት። ወቡሩክ ፍሬ ከርሥኪ ኦ ማርያም ወላዲተ አምላክ ዘእንበለ ርኩስ። ሠረቀ ለነ እምኔኪ ፀሐየ ጽድቅ። ወአቅረበነ ታሕተ ክነፊሁ እስመ ውእቱ ፈጠረነ። ሰአሊ ለነ ቅድስት።

ለኪ ለባሕቲትኪ ኦ እግዝእትነ ወላዲተ አምላክ እመ ብርሃን አንቲ ናዐብየኪ በስብሐት ወበውዳሴ። ቡርክት አንቲ ተዐብዪ አምሰማይ ወትከብሪ እምድር ወላዕለ ኩሉ ኅሊናት። መኑ ዘይክል ነቢበ ዕበየኪ ወአልቦ ዘይመስል ኪያኪ። ኦ ማርያም መላእክት ያዐብዩኪ ወሱራፌል ይሴብሑኪ። እስመ ዘይነብር ዲበ ኪሩቤል ወሱራፌል መፅአ ወኀደረ ውስተ ከርሥኪ መፍቀሬ ሰብዕ አቅረበነ ኀቤሁ። ዘዚአነ ሞተ ነሥአ ወእንቲአሁ ሕይወተ ወሀበነ። ዘሎቱ ክብር ወስብሐት። ሰአሊ ለነ ቅድስት።

ቡርክት አንቲ ማርያም ወቡርክት ፍሬ ከርሥኪ። ኦ ድንግል ወላዲተ አምላክ ምክሖን ለደናግል። ዘእምቅድመ ዓለም ህልው ወፅአ እምከርሥኪ ሥጋነ ነሥአ። ወመንፈሶ ቅዱሰ ወሀበነ ወረሰየነ ዕሩያነ ምስሌሁ በብዝኀ ኂሩቱ አንቲ ተዐብዪ እምብዙኃት አንስት እለ ነስአ ጸጋ ወክብረ። ኦ ማርያም ወላዲተ አምላክ ሀገር መንፈሳዊት ዘኀደረ ላዕሌሃ እግዚአብሔር ልዑል። እስመ ዘይነብር ዲበ ኪሩቤል ወሱራፌል በእራኅኪ ሐቀፍኪዮ ወዘይሴሲ ለኩሉ ዘሥጋ በብዝኀ ኂሩቱ አኀዘ አጥባተኪ ወጠበወ ሐሊበ ዘውእቱ አምላክነ መድኃኔ ኩሉ ይርእየነ እስከ ለዓለም ንስግድ ሎቱ ወንሰብሖ። እስመ ውእቱ ፈጠረነ። ሰአሊ ለነ ቅድስት።

ማርያም ድንግል ሙዳየ ዕፍረት። ነቅዓ ፈልፈለ ማየ ሕይወት ፍሬ ከርሣ አድኃነ ኲሎ ዓለመ ወሠዐረ እምኔነ መርገመ። ወገብረ ሰላመ ማእከሌነ በመስቀሉ ወበትንሣኤሁ ቅድስት አግብኦ ለብእሲ ዳግመ ውስተ ገነት። ሰአሊ ለነ ቅድስት።

ማርያም ንጽሕት ድንግል ወላዲተ አምላክ ማእምንት ሰአሊተ ምሕረት ለውሉደ ሰብእ። ሰአሊ ለነ ኀበ ክርስቶስ ወልድኪ ይስረይ ኃጢአተነ። ሰአሊ ለነ ቅድስት።

ማርያም ድንግል ትጸርህ በቤተ መቅደስ። ወትብል የአምር እግዚአብሔር ከመ አልብየ ዘየአምር ባዕድ ወኢምንትኒ ዘእንበለ ድምፀ ቃሉ ለመልአክ ዘአብሠረኒ በክብር ወይቤለኒ ሰላም ለኪ ኦ ቅድስት ድንግል ፆርኪ ዘይፀወር አግመርኪ ዘኢይትገመር ወአልቦ ዘያገምሮ ምንትኒ። ይበዝኅ ውዳሴኪ ኦ ምልዕተ ጸጋ በኩሉ ክብር እስመ ኮንኪ አንቲ ማኅደረ ቃለ አብ አንቲ ውእቱ መንጦላዕት ስፍሕት እንተ ታስተጋብኦሙ ለመሃይምናን ሕዝበ ክርስቲያን ወትሜህሮሙ ሰጊደ ለሥሉስ ማኅየዊ። አንቲ ውእቱ ዘፆርኪ ዓምደ እሳት ዘርእየ ሙሴ ዘውእቱ ወልደ እግዚአብሔር መጽአ ወኃደረ ውስተ ከርሥኪ። ኮንኪ ታቦቶ ፈጣሬ ሰማያት ወምድር። ፆርኪዮ በከርስኪ ተስዐተ አውራኃ አንቲ ማእምንት ለዘኢያገምርዎ ሰማያት ወምድር። ኮንኪ ተንከተመ ለዕርገት ውስተ ሰማይ። ብርሃንኪ የዐቢ እምብርሃነ ፀሐይ አንቲ ውእቱ ምሥራቅ ዘወፅአ እምኔኪ ኮከብ ብሩህ ዘነፀርዎ ቅዱሳን በፍስሐ ወበሐሴት ዘፈትሐ ላዕለ ሔዋን ትለድ በፃዕር ወሕማም። አንቲሰ ማርያም ሰማዕኪ ዘይብል ተፈሥሒ ኦ ምልዕተ ጸጋ ወለድኪ ለነ ንጉሠ እግዚአ ኩሉ ፍጥረት መጽአ ወአድኀነነ። እስመ መሐሪ ውእቱ ወመፍቀሬ ሰብእ በእንተዝ ንዌድሰኪ በከመ ገብርኤል መልአክ እንዘ ንብል ቡርክት አንቲ ማርያም ወቡሩክ ፍሬ ከርሥኪ። ተፈሥሒ ኦ ምልዕተ ጸጋ እግዚአብሔር ምስሌኪ። ሰአሊ ለነ ቅድስት ።

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ቀዳሚት ሰንበት

ንጽሕት ወብርህት ወቅድስት በኲሉ እንተ ሐቀፈቶ ለእግዚእ በእራኃ። ወኩሉ ፍጥረት ይትፌስሑ ምስሌሃ እንዘ ይጸርሑ ወይብሉ። ሰአሊ ለነ ቅድስት።

ተፈሥሒ ኦ ምልዕተ ጸጋ። ተፈሥሒ እስመ ረከብኪ ሞገስ። ተፈሥሒ እግዚአብሔር ምስሌኪ።. ናስተበፅእ ዕበየኪ ኦ ግርምት ድንግል ወንፌኑ ለኪ ፍስሐ ምስለ ገብርኤል መልአክ እስመ እምፍሬ ከርስኪ ኮነ መድኀኒተ ዘመድነ። ወአቅረበነ ኀበ እግዚአብሔር አቡሁ። ሰአሊ ለነ ቅድስት።

ከመ ከብካብ ዘአልቦ ጥልቀት መንፈስ ቅዱስ ኀደረ ላዕሌኪ ወኃይለ ልዑል ጸለለኪ ኦ ማርያም አማን ወለድኪ ቃለ ወልደ አብ ዘይነብር ለዓለም መጽአ ወአድኃነነ እምኃጢአት ። ሰአሊ ለነ ቅድስት ።

አንቲ ውእቱ ዘመድ ዘእምሥርወ ዳዊት ወለድኪ ለነ በሥጋ መድኃኒነ ኢየሱስ ክርስቶስ ዋህድ ቃል ዘእምአብ ዘእምቅድመ ዓለም ህልው ኅቡእ ኀብአ ርእሶ። ወነስአ እምኔኪ አርአያ ገብር። ሰአሊ ለነ ቅድስት።

ኮንኪ ዳግሚተ ሰማይ ዲበ ምድር ኦ ወላዲተ አምላክ ዘእንበለ ርኩስ። ሠረቀ ለነ እምኔኪ ፀሐየ ጽድቅ ወወለድኪዮ በከመ ትንቢተ ነቢያት ዘእንበለ ዘርዕ ወኢሙስና። ሰአሊ ለነ ቅድስት።

አንቲ ውእቱ ደብተራ እንተ ተሰመይኪ ቅድስተ ቅዱሳን። ወውስቴታ ታቦት በወርቅ ልቡጥ እምኵለሄ ወውስቴታ ጽላተ ኪዳን። መሶበ ወርቅ እንተ ውስቴታ መና ኅቡዕ ዘውእቱ ወልደ እግዚአብሔር መጽአ ወኀደረ ኀበ ማርያም ድንግል ዘእንበለ ርኵስ ተሰብአ እምኔሃ ቃለ አብ ወወለደቶ ውስተ ዓለም ለንጉሠ ስብሐት መጽአ ወአድኀነነ። ትትፌሳሐ ገነት እመ በግዕ ነባቢ ወልደ አብ ዘይነብር ለዓለም መጽአ ወአድኀነነ እምኃጢአት። ሰአሊ ለነ ቅድስት።

ተሰመይኪ እመ ለክርስቶስ ንጉሥ። እምድኅረ ወለድከመ ኪያሁ ነበርኪ በድንግና በመንክር ምስጢር። ወወለድኪዮ ለዐማኑኤል ወበእንተዝ ዐቀበኪ እንበለ ሙስና። ሰአሊ ለነ ቅድስት።

አንቲ ውእቱ ሰዋስው ዘርእየ ያዕቆብ እግዚአብሔር ላዕሌሁ። እስመ ፆርኪ በከርስኪ ኅቱም ዘኢይትዐወቅ እምኲለሄ ኮንኪ ለነ ሰአሊተ ኀበ እግዚእነ ኢየሱስ ክርስቶስ ዘተሰብአ እምኔኪ በእንተ መድኃኒትነ ። ሰአሊ ለነ ቅድስት።

ናሁ እግዚእ ወፅአ እምኔኪ ኦ ቡርክት ጽርሕ ንጽሕት ያድኅን ኲሎ ዓለመ ዘፈጠረ በዕበየ ሣህሉ ንሰብሖ ወንወድሶ። እስመ ውእቱ ኄር ወመፍቀሬ ሰብእ ። ሰአሊ ለነ ቅድስት።

ተፈሥሒ ኦ ምልዕተ ጸጋ ድንግል ዘእንበለ ርኲስ። ልሕኲት ንጽሕት ክብረ ኩሉ ዓለም። ብርሃን ዘኢትጠፍእ። መቅደስ ዘኢትትነሰት በትረ ሃይማኖት ዘኢትጸንን። ምስማኮሙ ለቅዱሳን ሰአሊ ለነ ኀበ ወልድኪ ኄር መድኃኒነ ይምሐረነ ወይሣሃለነ ይሥረይ ኃጢአተነ ። ሰአሊ ለነ ቅድስት ።

ተሰመይኪ ፍቅርተ ኦ ቡርክት እምአንስት። አንቲ ውእቱ ዳግሚት ቀመር እንተ ትሰመይ ቅድስተ ቅዱሳን ወውስቴታ ጽላተ ኪዳን። ዐሠርቱ ቃላት እለ ተጽሕፋ በአፃብዒሁ ለእግዚአብሔር ቀዲሙ ዜነወነ በየውጣ እንተ ይእቲ ቀዳሜ ስሙ ለመድኃኒነ ኢየሱስ ክርስቶስ ዘተሰብአ እምኔኪ ዘእንበለ ውላጤ። ወኮነ ዓራቄ ለሐዲስ ኪዳን፡ በውኂዘ ደሙ ቅዱስ አንጽሐሙ ለመሃይምናን ወለሕዝብ ንጹሐን፡ ሰአሊ ለነ ቅድስት።

ወበእንተዝ ናዐብየኪ ኩልነ፡ ኦ እግእዝእትነ ወላዲተ አምላክ ንጽሕት ኩሎ ጊዜ ንስእል ወናንቀዐዱ ኀቤኪ፡ ከመ ንርክብ ሣህለ በኀበ መፍቀሬ ሰብእ። ታቦት በወርቅ ልቡጥ እምኩለሄ ዘግቡር እምዕፅ ዘኢይትነቀዝ ይትሜሰል ለነ ዘእግዚአብሔር ቃለ። ዘኮነ ሰብአ ዘእንበለ ፍልጠት ወኢውላጤ፡ መለኮት ንጹሕ ዘአልቦ ሙስና ዘዕሩይ ምስለ አብ ወቦቱ አብሠራ ለንጽሕት። ዘእንበለ ዘርዕ ኮነ ከማነ በኪነ ጥበቡ ቅዱስ። ዘተሰብአ እምነኪ ዘእንበለ ርኩስ። ደመረ መለኮቶ፡ ሰአሊ ለነ ቅድስት።

መቅደስ ዘይኬልልዋ ኪሩቤል እለ ሥዑላን በሥዕለ እግዚአብሔር፡ ቃል ዘተሰብአ እምኔኪ ኦ ንጽሕት ዘእንበለ ውላጤ ኮነ ሠራዬ ኃጥአተነ ወደምሳሴ አበሳነ፡ ሰአሊ ለነ ቅድስት።

አንቲ ውእቱ መሶበ ወርቅ ንጹሕ እንተ ውስቴታ መና ኅቡእ፡ ኅብስት ዘወረደ እምሰማያት ወሀቤ ሕይወት ለኩሉ ዓለም፡ ሰአሊ ለነ ቅድስት።

እንቲ ውእቱ ተቅዋም ዘወርቅ እንተ ፆርኪ ማኅቶተ ፀዳል ኩሎ ጊዜ። ዘውእቱ ብርሃኑ ለዓለም። ብርሃን ዘእምብርሃን ዘአልቦ ጥንት። አምላክ ዘእምአምላክ ዘበአማን። ዘተሰብአ እምኔኪ ዘእንበለ ውላጤ። ወበምጽአቱ አብርሃ ላዕሌነ ለእለ ንነብር ውስተ ጽልመት ወጽላሎተ ሞት። ወአርአትዐ እገሪነ ውስተ ፍኖተ ሰላም በምሥጢረ ጥበቡ ቅዱስ፡ ሰአሊ ለነ ቅድስት።

አንቲ ውእቱ ማዕጠንት ዘወርቅ፡ እንተ ፆርኪ ፍሕመ እሳት። ቡሩክ ዘነሥአ እመቅደስ። ዘይሠሪ ኃጢአተ ወይደመሰስ ጌጋየ። ዝ ውእቱ ዘእግዚአብሔር ቃል ዘተሰብአ እምነኪ ዘአዕረገ ለአቡሁ ርእሶ ዕጣነ ወመሥዋዕተ ሥሙረ። ሰአሊ ለነ ቅድስት።

ተፈሥሒ ኦ ማርያም ርግብ ሠናይት። ዘወለድኪ ለነ ዘእግዚአብሔር ቃለ። አንቲ ውእቱ ጽጌ መዓዛ ሠናይ እንተ ሠረፀት እምሥርወ ዕሤይ። ሰአሊ ለነ ቅድስት።

በትረ አሮን እንተ ሠረፀት ዘእንበለ ተክል ወኢሠቀይዋ ማየ፡ ከማሃ አንቲኒ ኦ ወላዲተ ክርስቶስ አምላክነ ዘበአማን ዘእንበለ ዘርዕ መጽአ ወአድኀነነ። ሰአሊ ለነ ቅድስት።

ለኪ ይደሉ ዘእምኩሎሙ ቅዱሳን ትስአሊ ለነ ኦ ምልዕተ ጸጋ አንቲ ተዐብዪ እምሊቃነ ጳጳሳት ወፈድፋደ ትከብሪ እምነቢያት። ብኪ ግርማ ራእይ ዘየዐቢ እምግርማ ሱራፌል ወኪሩቤል። አንቲ በአማን ምክሐ ዘመድነ። ወሰአሊት ሕይወተ ለነፍሳቲነ። ሰአሊ ለነ ኀበ እግዚእነ ወመድኃኒነ ኢየሱስ ክርስቶስ። ያፅንዐነ በርትዕት ሃይማኖት ውስተ አሚነ ዚአሁ። ይጸግወነ ሣህሎ ወምሕረቶ። ይሥረይ ኃጢአተነ በብዝኃ ምሕረቱ። ሰአሊ ለነ ቅድስት።

ውዳሴ ወግናይ ለእመ አዶናይ። ቅድስት ወብፅዕት፤ ስብሕት ወቡርክት ክብርት ወልዕልት አንቀጸ ብርሃን መዐርገ ሕይወት ወማኅደረ መለኮት፤ ቅድስተ ቅዱሳን አንቲ ውእቱ ኦ እግዝእትነ ወላዲተ አምላክ ማርያም ድንግል። ተሰመይኪ ሥምረተ አብ ወማኅደረ ወልድ ወምጽላለ ዘቅዱስ መንፈስ ኦ ቡርክት እምኩሉ ፍጥረት አንቲ ውእቱ ህየንተ አርያም ዘበሰማያት ዘኮንኪ አርያመ በዲበ ምድር። ብኪ አስተማሰሉ ቅዱሳን ነቢያት ካህናት ወነገሥት ገብሩ ሎሙ ቅድስተ ቅዱሳን ወውስቴታ ጽላተ ኪዳን። ወልድኪ ሣህሎ ይክፍለነ ሰአሊ ለነ ቅድስት።

በእንተ ተሠግዎቱ ለወልደ አምላክ እምኔኪ ወብኪ ቅሩባነ ኮነ እምድር ለማኅደር ውስተ አርያም። ብኪ ወበስመ ወልድኪ ቅሩባነ ኮነ። አሠርቱ ቃላት እለ ተጽሕፋ በአጻብዒሁ ለእግዚአ ኵሉ ፍጥረት፣ ኀደረ ወልደ አምላክ ላዕሌኪ አብ በየማኑ ከደነኪ። ወቅዱስ መንፈስ ጸለለኪ። ወኃይለ ልዑል አጽንዐኪ። ወኢየሱስ ለብሰ ሥጋ ዚአኪ። ከልሐ ወይቤ ዘጸምአ ይምጻእ ኀቤየ ወይስተይ። በከመ ይቤ መጽሐፍ አፍላገ ማየ ሕይወት ዘይውኅዝ እምከርሡ። ወልድኪ ሣህሎ ይክፍለነ ሰአሊ ለነ ቅድስት።

ቀዲሙ ዜነወነ አብ በየውጣ እንተ ይእቲ አሠርቱ ቃላት እለ ተጽሕፋ በአፃብዒሁ ለእግዚአብሔር ወመሐረነ ወልድከ እግዚእነ ወመድኃኒነ ኢየሱስ ክርስቶስ ከመ አንተ ባሕቲትከ አቡሁ ሎቱ ወውእቱ ባሕቲቱ ወልድ ለከ። ከመዝ ነአምን ዘአልቦቱ እም በሰማያት ወአብ በዲበ ምድር፤ ዘወረደ እምሰማያት እንዘ አልቦ ዘየአምር ምጽአቶ ዘእንበለ አቡሁ ባሕቲቱ ወጳራቅሊጦስ መንፈሰ ጽድቅ ኀደረ ውስተ ከርሥኪ ወፆርኪዮ ተስዓተ አውራኅ። ተፈሥሑ ሰማያት ወተሐሥየት ምድር በልደቱ ለወልድኪ መልአክ ዜነወ ፍሥሐ። ወሐራ ሰማይ ሰብሑ እንዘ ይብሉ ስብሐት ለእግዚአብሔር በሰማያት ወሰላም በምድር ለዕጓለ እመሕያው ሥምረቱ። ወኖሎት በቤተልሔም አንከሩ እምዘርእዩ ወሰምዑ። ሰብአ ሰገል ርእዮሙ ኮከበ መጽኡ እምርኁቅ ብሔር ከመ ይስግዱ ለወልድኪ ወይግነዩ ለኪ። ውእቱ ኮከብ ዘመርሖሙ እምሥራቅ ወአብጽሖሙ እስከ ቤተልሔም ቆመ መልዕልቴኪ ኀበ ሀሎኪ አንቲ ምስለ ሕፃንኪ። ወርእዮሙ እልክቱ መሰግላን ተፈሥሑ ዐቢየ ፍሥሐ። ቦኡ ኀቤሁ ወቆሙ ቅድሜሁ ወወድቁ ዲበ ምድር ወሰገዱ ሎቱ ወአርኅዉ መዛግብቲሆሙ ወአብኡ ሎቱ አምኃ ወርቀ ከርቤ ወስኂነ ወይቤሉ አምኃ አባዕነ ለከ ዕጣነ አቅረብነ ለከ እምዚአከ ለክቡር ስምከ ኦ አምላክነ በእንተ ኃጢአተ ሕዝብከ ከመ ትትወከፍ ስእለቶሙ ወመሥዋዕቶሙ ዘመጻእከ ከመ ትሥረይ ሎሙ ኃጢአቶሙ። ወልድኪ ሣህሎ ይክፍለነ ሰአሊ ለነ ቅድስት።

አንቲ ውእቱ ንጽሕት እምንጹሐን ድንግል ኅሪት ዘነበርኪ ውስተ ቤተ መቅደስ ከመ ታቦት ዘግቡር እምዕፅ ዘኢይነቅዝ ሥርግው በወርቅ ንጡፍ ወልቡጥ በዕንቄ ባሕርይ ዘየኃቱ ዘብዙኅ ሤጡ ከመዝ ነበርኪ ውስተ ቤተ መቅደስ። ወመላእክት ያመጽኡ ወትረ ሲሳየኪ ከመዝ ነበርኪ ዐሠርተ ወክልኤተ ዓመተ እንዘ ትትናዘዚ እምኀበ መላእክት ስቴኪኒ ስቴ ሕይወት ውእቱ። መብልዕኪኒ ኅብስት ሰማያዊ። ዳዊት አቡኪ ዘመረ በመሰንቆ ወኀለየ በመዝሙር እንዘ ይብል በመንፈስ ትንቢት ስምዒ ወለትየ ወርእዩ ወአፅምዒ እዝነኪ፤ ርስዒ ሕዝበኪ ወቤተ አቡኪ እስመ ፈተወ ንጉሥ ሥነኪ እስመ ውእቱ እግዚእኪ ወሎቱ ትሰግዲ። ወልድኪ ሣህሎ ይክፍለነ ሰአሊ ለነ ቅድስት።

ገብርኤል መልአክ እመላእክት ንጹሐን ዘአልቦ ሙስና እመላእክት ቀደምት ዘይቀውም ቅድመ እግዚአ ኵሉ አብሠረኪ ወይቤለኪ ተፈሥሒ ፍሥሕት እግዚአብሔር ምስሌኪ ቡርክት አንቲ እምአንስት ረከብኪ ሞገሰ በኀበ እግዚአ ኵሉ። ወናሁ ትፀንሲ ወትወልዲ ወልደ ወትሰምዪዮ ስሞ ኢየሱስ ውእቱ ዐቢይ ወይሰመይ ወልደ ልዑል። ወይሁቦ እግዚአብሔር አምላክ መንበረ ዳዊት አቡሁ ወይነግሥ ለቤተ ያዕቆብ ለዓለም ወአልቦ ማኅለቅት ለመንግሥቱ መንፈስ ቅዱስ ይመጽእ ላዕሌኪ ወኃይለ ልዑል ይጼልለኪ። ዘኒ ይትወለድ እምኔኪ ቅዱስ ውእቱ ወይሰመይ ወልደ እግዚአ ኵሉ። ዘተወልደ እምኔኪ ወልድኪ ሣህሎ ይክፍለነ ሰአሊ ለነ ቅድስት።

እንቲ ውእቱ ዘኮንኪ ጽርሐ ቅድሳት ወመቅደሰ ቅድስተ ቅዱሳን ወመንጦላዕተ ብርሃን ወመንበረ ስብሐት ዘኢይተረጎም። አስተማሰልናኪ ኦ ቅድስት ማርያም በመቅደሰ ቅድስተ ቅዱሳን። በእንተ ቅዱስ መንፈስ ዘመጽአ ላዕሌኪ ወኃይለ ልዑል ጸለለኪ ወመንጦላዕተ ብርሃንሰ በእንተ ዘተሠወረ ቃለ አብ ኢየሱስ ክርስቶስ መድኃኒነ ውስተ ከርሥኪ። እግዚአ ኩሉ ዘመልዕልት ዘይሴብሕዎ መላእክት ወሊቃነ መላእክት መናብርት ወሥልጣናት አጋዕዝት ወኃይላት ሊቃናት ወመኳንንት። ወሶበ ወለድኪ ወልደኪ በዲበ ምድር በውስተ ጎል ከለሉኪ ኪሩቤል እለ ብዙኃት አዕንቲሆሙ ወሱራፌል እለ ስድስቱ ክነፊሆሙ። ወደመናተ ብርሃን ፆዱኪ። ሊቃነ መላእክት ወሠራዊተ መላእክት ወሐራ ሰማይ ቆሙ ቅድሜኪ በፍርሃት ወበረዓድ። ወበህየ በካልእ ስብሐት ወደሱኪ ኪሩቤል ወሱራፌል ዘኢኮነ እምስብሐቲሆሙ ዘውስተ ሰማያት ወኢእምስብሐቲሆሙ ዘትካት። ወሶበ ርእዩ እግዚኦሙ ዘአስተጋብኦ ኪሎ ፍጥረታተ እንዘ ይነብር ውስተ ሕፅንኪ። ወዘይሴሲ ለኩሉ ፍጥረት ይጠቡ ሐሊበኪ ከመ ሕፃን ኀሠሥዎ ውስተ አርያም ወበህየ ረከብዎ ምስለ አቡሁ ወመንፈስ ቅዱስ ከመ ትካት። ወሶበ ርእዩ ትሕትናሁ ለእግዚኦሙ አልዐሉ አዕይንቲሆሙ ላዕለ ውስተ አርያም። ሰፍሑ ክነፊሆሙ ወሰብሑ ለእግዚኦሙ እንዘ ይብሉ ስብሐት ለከ እግዚኦ ኩሉ በሰማያት። ወዓዲ ርአዩኪ በውስተ በዓት ለኪ ለባሕቲትኪ ምስለ ሕፃንኪ ወይቤሉ ሰላም በዲበ ምድር። ወሶበ ርእዩ እንዘ ይለብስ ሥጋ ዚአነ ዘነሥአ እምኔኪ ሰገዱ እንዘ ይብሉ ለዕጓለ እመሕያው ሠምሮ። ዳዊት ነቢይ ተነበየ በመዝሙር እንዘ ይብል። እምሰማይ ሐወፀ እግዚኦ ኩሉ ወእምድልው ጽርሐ መቅደሱ። ወርእየ ኲሎ ደቂቀ ዕጓለ እመሕያው። ፈተወ ንጉሥ ሥነኪ ወይቤ ዛቲ ይእቲ ምዕራፍየ ለዓለም። ዝየ አኀድር እስመ ኀረይክዋ። ወልድኪ ሣህሎ ይክፍለነ ሰአሊ ለነ ቅድስት።

አስተማሰልናኪ ቅድስት ወብፅዕት፤ ስብሕት ወቡርክት፤ ክብርት ወልዕልት፤ በመሶበ ዘወርቅ ዘውስቴታ ኅብስተ ሕይወት ዘወረደ እምሰማያት ወሀቤ ሕይወት ለኩሉ ዘየአምን ኪያሁ ወይበልዕ እምኔሁ በአሚን ወበልብ ሥሙር ምስለ እለ በየማኑ። ወልድኪ ሣህሎ ይክፍለነ ሰአሊ ለነ ቅድስት።

አንቲ ውእቱ ተቅዋም ዘወርቅ ዘኢገብራ እደ ኬንያ ዘሰብእ ወኢያኀትዉ ውስቴታ ማኅቶተ። አላ ለሊሁ ብርሃነ አብ።  ብርሃን ዘእምብርሃን መጽአ ኀቤኪ ወነበረ መልዕልቴኪ ወአብርሀ በመለኮቱ ወስተ ኩሉ አጽናፈ ዓለም። ሰደደ ጽልመተ እምላዕለ ሰብእ ወአድኀነነ በቃሉ ማሕያዊ እንዘ ይብል አነ ውእቱ ብርሃኑ ለዓለም። እመኑ በብርሃኑ ወአንሶስዉ እንዘ ብክሙ ብርሃን። ወልድኪ ሣህሎ ይክፍለነ ሰአሊ ለነ ቅድስት።

እግዚአ ኩሉ ዘእምእግዚአ ኩሉ ብርሃን ዘእምብርሃን እግዚእ ዘበአማን ዘእምእግዚአ ኩሉ ዘበአማን ዘተወልደ ወአኮ ዘተገብረ፤ ኅቡር ህላዌሁ ምስለ አቡሁ ዘቦቱ ኩሉ ኮነ ዘበሰማይኒ ወበዘምድርኒ ዘበእንቲአነ ለሰብእ ወበእንተ መድኃኒትነ ወረደ ወተሠገወ ወተሰብአ እማርያም እምቅድስት ድንግል ወበምጽአቱ አብርሀ ላዕሌነ ወዜነወነ ትፍሥሕተ። ወአቅረበነ ኀበ አቡሁ። ወመርሐነ ፍኖተ ሕይወት ወወሀበነ ሕይወት ዘለዓለም። በአሚነ ዚአሁ ኢሳይያስ ነቢይ እምትእዛዙ ለኢየሱስ አንከረ በትንቢት ወይቤ ብርሃን ትእዛዝከ በዲበ ምድር። ዘካርያስ ካህን አረጋዊ ጻድቅ ወንጹሕ ዘይገብር ትእዛዙ ለእግዚአ ኩሉ አንከረ ወተደመ ከሠተ አፍሁ ወይቤ በሣህሉ ወበምሕረቱ ለአምላክነ ለዘሐወፀነ እምአርያም ወሠረቀ ከመ ያርእዮሙ ብርሃኖ ለእለ ይነብሩ ውስተ ጽልመት ወጽላሎተ ሞት። ወአርትዐ እገሪነ ውስተ ፍኖተ ሰላም ከመ ይምሐረነ። ወልድኪ ሣህሎ ይክፍለነ ሰአሊ ለነ ቅድስት።

ናስተማስለኪ ኦ እግዝእትነ በማዕጠንት ዘወርቅ ዘውሰተ እደዊሆሙ ለሊቃነ ካህናት ሰማያውያን እለ ይከውኑ ጸሎተ ኩሎሙ ቅዱሳን፤ መሃይማናን እምዲበ ምድር በውስተ ማዕጠንቶሙ። ከማሁ በስእለተ ስምኪ ያዐርጉ ስእለቶሙ ለዕጓለ እመሕያው ውስተ ማኅደረ ሥሉስ ቅዱስ አብ ወወልድ ወመንፈስ ቅዱስ ወታስተሥርዩ ኃጢአተ ሕዝብኪ ተበውሐ ለኪ እምአብ ወወልድ ወመንፈስ ቅዱስ ከመ ትኩኒ ተንከተመ ለውሉደ ሰብእ ለሕይወት ዘለዓለም። ለኪ ይደሉ ከመ ትኩኒ መድኃኒቶሙ ለመሃይምናን ሕዝብኪ ኦ መድኃኒተ ኵሉ ዓለም። ወልድኪ ሣህሎ ይክፍለነ ሰአሊ ለነ ቅድስት።

አንቲ ውእቱ ዕፅ ቡሩክ ዕፀ ሕይወት ወዕፀ መድኃኒት። ህየንተ ዕፀ ሕይወት ዘውስተ ገነት ዘኮንኪ ዕፀ ሕይወት በዲበ ምድር። ፍሬኪኒ ፍሬ ሕይወት ውእቱ ወዘበልዐ እምኔሁ ሕይወተ ዘለዓለም የሐዩ። ጽጌ አስተርአየ እምኔኪ ዘሠናየ መዓዛ ይምዕዝ በኀበ እለ የአምርዎ ውስተ ኵሉ አጽናፈ ዓለም፤ ዘበእንቲአሁ ተነበየ ዳዊት በመዝሙር እንዘ ይብል ከርቤ ወሚዓ ወሰሊክ እምነ አልባስኪ። ሰሎሞን አቡኪ ተነበየ ወይቤ ፄና አንፍኪ ከመ ፄና ስኂን። ገነት ዕፁት እኅትየ መርዓት። ገነት ዕፁት ዐዘቅት ኅትምት ፍናወ ዚአኪ ገነት ስለፍሬ አቅማሕ። ቆዕ ምስለ ናርዶስ። ናርዶስ ዘምስለ መጽርይ ቀጺመታት ወቀናንሞስ ምስለ ኩሉ ዕፀወ ሊባኖስ። ከርቤ ወአልው ምስለ ኩሉ መቅድመ ዕፍረታት። ነቅዐ ገነት ዐዘቅተ ማየ ሕይወት ዘይውኅዝ እምሊባኖስ። ወልድኪ ሣህሎ ይክፍለነ ሰአሊ ለነ ቅድስት።

በትረ አሮን እንተ ሠረፀት ዘእንበለ ተክል ወኢሠቀይዎ ማየ በቤተ መቅደስ ወረሰያ ድሉተ ለካህናት። ከማሃ አንቲኒ ነበርኪ ውስተ ቤተ መቅደስ በቅድስና ወበንጽሕ። ወወፃእኪ እምቤተ መቅደስ በክብር ወበዐቢይ ፍሥሐ። ወሠረፀ እምኔኪ ፍሬ ሕይወት ዘበአማን እግዚእነ ወመድኃኒንነ ኢየሱስ ክርስቶስ ኦ ቅድስት ዘእንበለ ሩካቤ ረከብኪ ወልደ በከመ ተጠየቂዮ ለመልአክ። ወይቤሌኪ መንፈስ ቅዱስ ይመጽእ ላዕለኪ ወኃይለ ልዑል ይጼልለኪ። ወልድኪ ሣህሎ ይክፍለነ ሰአሊ ለነ ቅድስት።

ለኪ ይደሉ ለአግብርትኪ ወለአእማትኪ ትስአሊ ለነ ኀበ ወልድኪ ለእለ አመነ በስመ ወልድኪ። ኦ ምልዕተ ጸጋ ኦ ሙኃዘ ፍሥሐ ፈድፋደ ብኪ ግርማ ራእይ ዘየዐቢ እምኪሩቤል እለ ብዙኃት አዕንቲሆም ወሱራፌል እለ ስድስቱ ክነፈሆም እልክቱ ይከድኑ ገጾሙ ወእገረሆሙ በአርአያ ትእምርተ መስቀል ከመ ይድኅኑ እምእሳት ዘይወፅእ እመለኮተ ወልድኪ። አንቲሰ ኮንኪ ማኅፈደ ለመለኮት ወኢያውዐየኪ እሳተ መለኮት ፆርኪ ነበልባለ እሳት ወኢያውዐየኪ ነበልባለ መለኮት። ተመሰልኪ ዕፀ ጳጦስ ዘርእየ ሙሴ በነደ እሳት ወዕፀታ ኢውዕየ ከማሁ ኢያውዐየኪ እግዚአ ኃይላት ዘኩለንታሁ እሳት ፍጹም አንቲ በአማን ዘኮንኪ ምክሐ ለዘመደ ክርስቲያን። ወብኪ ቅሩባነ ኮነ እምድር ለማኅደር ውስተ አርያም በእንተ ተሠግዎቱ ለወልደ አምላክ እምኔኪ። ወሰአሊት ለነፍሳቲነ ሕይወተ ኦ ጸጋዊተ ምሕረት ለእለ የአምኑ በጸሎታ። ሰአሊ ለነ ኀበ እግዚእነ ወመድኃኒነ ኢየሱስ ክርስቶስ ያጽንዐነ በርትዕት ሃይማኖት ውስተ አሚነ ዚአሁ ወዘአቡሁ ወዘቅዱስ መንፈሱ ይጸግወነ ሣህሎ ወምሕረቶ ይሥረይ ኃጢአተነ በብዝኀ ምሕረቱ። ስብሐት ለኪ ኦ ወላዲተ እግዚአ ኵሉ። አኮቴት ወክብር ለአብ ወወልድ ወመንፈስ ቅዱስ ይእዜኒ ወዘልፈኒ ወለዓለም ዓለም አሜን። ወልድኪ ሣህሎ ይክፍለነ ሰአሊ ለነ ቅድስት። 

ይዌድስዋ መላእክት ለማርያም በውስተ ውሣጤ መንጦላዕት፡ ወይበልዋ በሐኪ ማርያም ሐዳስዩ ጣዕዋ። ይቤላ መልአክ ለማርያም ተወከፊዮ ለቃል ኀቤኪ ይመጽእ ወበማኅፀነ ዚአኪ የኅድር። እፎ ቤተ ነዳይ ኅደረ ከመ ምስኪን እምሰማያት ወረደ ላዕሌሃ ፈቲዎ ስነ ዚአሃ ወተወልደ እምኔሃ።

ወበሳድስ ወርኅ ተፈነወ ገብርኤል መልአክ እምኀበ እግዚአብሔር ኀበ አሐቲ ሀገር ዘገሊላ እንተ ስማ ናዝሬት ኀበ ድንግል እንተ ተፍኅረት ለብእሲ ዘስሙ ዮስፍ ዘእምቤተ ዳዊት። ወስማ ለይእቲ ድንግል ማርያም፡ ቦአ መልአክ ኀቤሃ ወይበላ ተፈሥሒ ፍሥሕት ኦ ምልዕተ ጸጋ እግዚአብሔር ምስሌኪ። ቡርክት አንቲ እምአንስት ወርእያ ደንገፀት እምቃሉ ወኀለየት ወትቤ፡ እፎኑ ከመዝኑ እንጋ አምኃ ይትአምኁ። ወይቤላ መልአክ ኢትፍርሂ ማርያም እስመ ረከብኪ ሞገሰ በኀበ እግዚአብሔር። ወናሁ ትፀንሲ ወትወልዲ ወልደ ወትሰምዩዮ ስሞ ኢየሱስ ውእቱ ዐቢይ ወይትሰመይ ወልደ እግዚአብሔር ልዑል። ወይሁቦ እግዚአብሔር አምላክ መንበረ ዳዊት አቡሁ ወይነግሥ ለቤተ ያዕቆብ ለዓለም ወአልቦ ማኅለቅት ለመንግስቱ፡ ትቤሎ ማርያም ለመልአክ እፎኑ ይከውነኒ ዘንቱ እንዘ ኢየአምር ብእሴ እፎኑ ይከውነኒ።  አውሥአ መልአክ ወይቤላ መንፈሰ ኢግዚአብሔር ቅዱስ ይመጽእ ልዕሌኪ ወኃይለ ልዑል ይጼልለኪ።  ዘኒ ይትወለድ እምኔኪ ቅዱስ ውእቱ ወይሰመይ ወልደ እግዚአብሔር ልዑል። ወናሁ ኤልሳቤጥኒ እንተ እምአዝማድኪ ይእቲ ፀንሰት ወረከበት ወልደ በልህቃቲሃ ወበርሥአቲሃ። ወናሁ ሳድስ ዝንቱ ወርኅ ለእንተ ይብልዋ መካን እስመ አልቦ ነገር ዘይስአኖ ለእግዚአብሔር። ትቤሎ ማርያም ለመልአክ ነየ አመቱ። ለእግዚአ ኩሉ ነየ አመቱ። ይኩነኒ በከመ ትቤለኒ።

ይቤላ መልአክ ሰላም ለኪ፡ ይቤላ ገብርኤል ሰላም ለኪ፡ ማርያም ድንግል ሰላም ለኪ፡ ወላዲተ አምላክ ሰላም ለኪ።
ማርያም ንጽሕት ሰላም ለኪ፡ ማርያም ውድስት ሰላም ለኪ፡ ማኅደረ መለኮት ሰላም ለኪ፡ ደብተራ ፍጽምት ሰላም ለኪ፡ እኅተ መላእክት ሰላም ለኪ፡ ወእመ ኩሉ ሕዝብ ሰላም ለኪ። እግዚእትነ ማርያም ሰላም ለኪ፡ ሰላማዊት ሰላም ለኪ፡ ቀደሰኪ ለማኅደሩ ልዑል ሰላም ለኪ። አብደረኪ ወኅረየኪ ከመ ትኩኒዮ ማኅደሮ ሰላም ለኪ፡ በአልባሰ ወርቅ ዑጽፍት ወኁብርት ሰላም ለኪ። ክነፈ ርግብ በብሩር ዘግቡር ሰላም ለኪ። ወገበዋቲሃኒ በሐመልማለ ወርቅ ማርያም ሥርጉት ሰላም ለኪ፡ ኆኅተ ምሥራቅ ወእሙ ለብርሃን ሰላም ለኪ። ትበርሂ እምፀሐይ ወትትሌዐሊ እምአድባር ሰላም ለኪ። ማርያም ኅሪት ወክብርት ሰላም ለኪ።

ሰአሊ ለነ ኅበ እግዚእነ ወመድኃኒነ ኢየሱስ ክርስቶስ፡ ከመ ያድኅነነ እመ ይመጽእ በስብሐተ አቡሁ ምስለ መላእክቲሁ ቅዱሳን። አመ ያቀውም አባግዐ በየማኑ ወአጣሌ በፀጋሙ፡ ያቁመነ በየማኑ ምስለ እስጢፋኖስ ሰማዕት ወዮሐንስ መጥመቅ። ወምስለ ኩሎሙ ቅዱሳን ወሰማዕት። ለዓለመ ዓለም አሜን።